(latınca - anthracites - kömür) daş kömürün bir növü. Qazıntı kömürlərin formalaşmasının son mərhələsi və ən qədimi olaraq daha yüksək dərəcədə metamorfizmə (kömürləşməyə) uğramışdır. Yerin dərinliklərində yerləşən torf müvafiq şəraitdə kömürləşmə prosesində əvvəlcə qonur, sonra daş kömür və sonrda antrasitə çevrilir. Daş kömür və qrafit arasında keçid mərhələsi kimi qəbul edilə bilər. Antrasit olduqca nadir faydalı qazıntıdır və daş kömürün ən yaxşı çeşididir. Qara-qonur rəngliliyi və güclü metal parıltılığı ilə fərqlənir. Yüksək istilik (tərkibində karbonun miqrarı maksimal - 94% təşkil edir) qabiliyyətlidir. Praktiki olaraq nəmlənmədən və mineral qatışıqlardan məhrumdur. Həmçinin yüksək sıxlığı və elektrikkeçirmə qabiliyyətinə də malikdir. Onun alovlandırılması (600-700 selsidə yanır) üçün səy göstərilməlidir. Uğurlu halda demək olar ki, alovsuz yanır və tüstü vermir. Bundan başqa, onun yanma məhsulları da qoxusuzdur. Yataqları əsasən 6 km dərinlikdə yerləşir və dağ silsilələri kimi yerin qabığının əhəmiyyətli hərəkətlərinə məruz qalan rayonlarda tapılır. Dünya kömür ehtiyatları arasında onun payı təxminən 3% təşkil edir. Əhəmiyyətli yataqlar Çin Xalq Respublikası, Rusiya, Ukrayna, Vyetnam, Koreya Xalq Demokratik Respublikası, Koreya Respublikası, Cənubi Afrika Respublikası, İspaniya, ABŞ və Polşadadır.