(ingiliscə - Baku-Tbilisi-Ceyhan (BTC) pipeline - Bakı-Tbilisi-Ceyhan (BTC) neft boru kəməri) Azərbaycan neftinin Xəzər dənizindən Turkiyənin Ceyhan limanına, oradan Aralıq dənizi vasitəsilə Avropa bazarlarına nəqlini həyata keçirən boru kəməri. Bakı yaxınlığındakı Səngəçal terminalından başlayan kəmər 2003-2005-ci illərdə inşa edilmişdir. Uzunluğu 1768 kilometrdir (Azərbaycan - 443 km, Gürcüstan - 249 km, Türkiyə 1076 km). Məhsuldarlığı 60 milyon ton/il, boru diametri Azərbaycanda və Türkiyədə əsasən 42 düym, Gürcüstanda 46 düymdür və bu ölçü Türkiyədə Ceyhan dəniz terminalına enən axırıncı hissədə 34 düymədək azalır (1066-1168 mm). Kəmərin neftlə doldurulmasına 2005-ci il mayın 6-da başlanılmışdır. Neftin etibarlı və fasiləsiz nəqlini təmin edən bu boru kəməri beynəlxalq enerji təhlükəsizliyinin əsas elementlərindən biri kimi Avrasiya regionunda ən iri və unikal mühəndis qurğularından hesab olunur. İllik ötürücülük qabiliyyəti 60 milyon tona çatdırılmış kəmər vasitəsi ilə Azərbaycan neftindən başqa Türkmənistan nefti də nəql olunur.