(ingiliscə - business - kommersiya fəaliyyəti) əmtəə və xidmətlərin istehsalı və ya onların satışı əsasında sistematik mənəfəət əldə edilməsinə yönəlmiş iqtisadi fəaliyyətdir. Bu ifadə ilk dəfə Fransa əsilli irlandiyalı bankçı və iqtisadçı Riçard Kantilyon (Richard Cantillon, 1680-1734) tərəfindən XVIII əsrdə işlədilmişdir. İstehsal, kommersiya, maliyyə, məsləhət (konsaltinq) və s. növlərini fərqləndirirlər. Sahibkarlıq bazar iqtisadiyyatının bütün institutlarına sirayət edən ən mühüm atributudur. Bu fəaliyyət hüquqi və ya fiziki şəxs tərəfindən həyata keçirilə bilər. Əksər ölkələrdə olduğu kimi, Azərbaycan Respublikasında da sahibkarlıq fəaliyyəti müvafiq qanunvericiliklə tənzimlənir və bu fəaliyyət növü ilə məşğul olmaq istəyən fiziki şəxsdən fərdi qaydada dövlət qeydiyyatına düşmək tələb edilir.