Mayın 31-də “Azərbaycanın vergi jurnalı”nın ümummilli lider Heydər Əliyevin 90 illik yubileyi münasibətilə magistrantlar arasında  elan etdiyi “Azərbaycan-2020: vergi sisteminin gələcəyinə baxış” mövzusunda  Beynəlxalq referat müsabiqəsinin yekunlarına həsr olunmuş tədbir keçirilmişdir.

Müsabiqənin məqsədi Azərbaycanın və dünyanın nüfuzlu ali təhsil müəssisələrinin magistrantları arasında vergi sahəsində araşdırmalar aparan ən yaxşı tədqiqatçıları üzə çıxarmaq, vergi mövzusunun gənclər arasında populyarlığını artırmaq və bu sahədə mütəxəssislərin hazırlığını stimullaşdırmaqdır.

 Tədbirdə qeyd olunmuşdur ki, müsabiqə bir neçə ildir keçirilir və ilk dəfə bu il beynəlxalq səviyyədə təşkil edilmişdir. Müsabiqəyə ABŞ, Türkiyə və Azərbaycanın müxtəlif ali məktəblərində təhsil alan magistrantlardan 25 iş daxil olmuşdur.

 Müsabiqənin yekunlarına əsasən, ABŞ-ın Seton Hall Universitetinin magistrantı Eyitayo Akanji birinci, həmin universitetin magistrantı Kler Finneqan ikinci, Türkiyənin Dokuz Eylül Universitetinin magistrantı Fatma Yapıcı, Azərbaycan Dövlət İqtisad Universitetinin magistrantı Ramin İlyasov və Azərbaycan Dövlət Neft Akademiyasının magistrantı Səftər Vəlizadə üçüncü yerlərə layiq görülmüşlər.

 Doqquz referatın müəllifinə isə həvəsləndirici mükafatlar verilməsi qərara alınmışdır.

 Qaliblərə diplom və qiymətli hədiyyələr, müsabiqədə fəal iştirak etmiş magistrantların hər birinə isə jurnalın təşəkkürnaməsi təqdim edilmişdir.

www.azertag.gov.az