(ingiliscə - International transport corridor North South - NS - Şimal-Cənub beynəlxalq nəqliyyat dəhlizi) Şimali Avropa ilə Cənub-Şərqi Asiyanı birləşdirən, Finlandiya, Baltika ölkələri ilə Hindistanın Rusiya, Azərbaycan və İran vasitəsi ilə nəqliyyat əlaqəsini təmin edən beynəlxalq dəhliz. “Şimal-Cənub” Beynəlxalq Nəqliyyat Dəhlizi haqqında Razılaşma Rusiya Federasiyası, İran İslam Respublikası və Hindistan arasında 12 sentyabr 2000-ci ildə Sankt-Peterburq şəhərində bağlanmışdır. Daxili prosedurlardan keçdikdən sonra Razılaşma 21 may 2002-ci il tarixdən qüvvəyə minmiş və 2005-ci ilin sentyabrında Azərbaycan Respublikası “Şimal-Cənub Beynəlxalq Nəqliyyat Dəhlizi haqqında” Sazişə qoşulmuşdur. Dəhliz üzrə marşrut Rusiyanın Sank-Peterburq şəhərindən Hindistanın Mumbay (Bombey) liman şəhərinə kimi 7,2 min km yolu əhatə edir. Yaxın illərdə bu marşrut Şimali Avropanı Hindistan və Fars körfəzi ölkələri əhatəsinə alaraq İran, Azərbaycan və Rusiyanın dəmir yollarını birləşdirəcəkdir. O, həmçinin Xəzər dənizi ətrafında dəmir yolu həlqəsinin çəkilməsi layihəsinin reallaşmasında da son vəzifələrdən biri olacaqdır. Dəhliz tam gücü ilə fəaliyyət göstərəcəyi halda Avropa ölkələrinin, Rusiyanın, Orta Asiya və Qafqaz regionunun Fars körfəzi və Hindistana çıxışına, Xəzəryanı ölkələrin Qara dəniz limanları ilə ticarət əlaqələrinin intensivləşməsinə şərait yaradaraq Avropa - Cənubi Asiya - Yaxın Şərq arasında dəmir yolu daşımalarını səmərəli təmin edəcəkdir.