(ingiliscə - South Caucasus Pipeline - Cənubi Qafqaz Qaz Boru Kəməri) Xəzər dənizinin Azərbaycan sektorunda yerləşən “Şahdəniz” yatağından çıxarılan qazın Gürcüstan və Türkiyəyə nəqli üçün inşa edilmiş qaz boru kəməri. “Şahdəniz” Boru Kəməri kimi də tanınır və bütövlükdə boru xətti Bakı-Tbilisi-Ərzurum kəməri adlanır (2007-ci ildə istismara verilmişdir). Uzunluğu 980 kilometr (Azərbaycan 443 km, Gürcüstan 248 km, Türkiyə 289 km), borunun diametri 1066 mm və məhsuldarlığı 23 milyard m³/il-dir (mövcud və genişləndirilmiş hissələr birlikdə). CQBK ətraf mühitə, həmçinin sosial təsiri minimuma endirmək üçün BTC boru kəməri ilə eyni dəhlizdə inşa edilmişdir (mövcud kəmərə birləşmiş paralel kəmər - lupinq çəkilmişdir). CQBK-nın iki operatoru var. CQBK obyektlərinin tikintisi və istismarı üzrə məsul texniki operator - BP şirkəti və CQBK-nın kommersiya əməliyyatları üzrə məsul kommersiya operatoru - SOCAR. CQBK-nin sərmayədarları qismində BP (28,8%), SOCAR (10%), “SGC Midstream” (6,7%), “Petronas” (15,5%), “LUKoil” (10%), NİCO (10%) və TPAO (19%) şirkətləri çıxış edir. CQBK-in 29 may 2018-ci il tarixində Bakı şəhərində rəsmi açılışı olmuşdur. Boru kəmərinin operatorları SOCAR, BP və BOTAŞ şirkətləridir.