(fransızca - Bureau International des Poids et Mesures, BIPM - Beynəlxalq Ağırliqlar və Ölçülər Bürosu, BİRM). Metrik Konvensiyanın imzalanması ilə birlikdə 1875-ci ildə təsis edilmiş, daimi fəaliyyət göstərən beynəlxalq təşkilat. BIPM Beynəlxalq Ağırlıqlar və Ölçülər Komitəsi - CIPM-nin (fransızca - Comité International des Poids et Mesures, CIPM) nəzarəti altında işləyir. Əsas vəzifəsi Metrik Konvensiyanın iştirakçısı olan bütün ölkələrdə vahid ölçü sisteminin mövcudluğunu təmin etməkdir. BIPM-də beynəlxalq etalonların işlənib hazırlanması, saxlanması, milli etalonların beynəlxalq etalonlar və onlar öz aralarındakı fərqliliyi, habelə uzlaşması ilə əlaqədar əsas vahidlərin beynəlxalq etalonları saxlanılır. Burada həmçinin ölçmələrin dəqiqliyini artırmaq məqsədi ilə metrologiya sahəsində də tədqiqatlar aparılır və ümumilikdə beynəlxalq metrologiya üzrə müvafiq işlər yerinə yetirilir. Hazırda büroda 60 dövlət tam hüquqlu, 42 isə o, cümlədən Azərbaycan assosiativ üzv kimi təmsil olunmuşlar. Büro Metrik Konvensiyada iştirak edən ölkələr tərəfindən maliyyələşdirilir. Mənzil qərargahı Fransanın Sevres şəhərində yerləşir.